Ünschrneis

Diä prächtägä Viärbeinr hend mr s uusägäli angätaa. Drum heds mi gnöössärät in dä Vrhübschärigssaloon va dä Chüä z luägä. Äs hed mr zwar villä d Schpraach vrschlagä, was in dem Zält alls abgangä ischt. Nid im Tromm het i dra tenkt, dass schi diä Buschäni müäand lä frisiärä, lä schärä und mit Haarschprei aa lä pfuufä. Wa i da ä jungä puschpärä Puur in dr blauä Chuttä gsee ha, wiä är mit dm Föön dr Chuä dr Widärischt zäm ä Bürschtäschnitt püschälät hed, han i tenkt, äs schtelli miär d Haar grad au uuf. Diä liäbä Milchlifärantänä hend in eir Ruä alls chlaglos übr schi lä ergaa. Ä Teil hend zwar afä leng Gsichtr gmachet und in dä Augä hed mä chönä läsä, dass sch übrhaupt nid schnalländ, zä was, dass söllis guät sii sötti. Diä gschornä Fälli hend gglenzt wiä Poppifüdäläni und diä gschtoornätä Häärli sind gsi wiä Döörä ufm Rügg. Ä Vee-Schpiägl han i niänä gsee. Diä Chüä hend nid chönä luägä, ob nä das nüüä Autfitt gfallt. So, und etz ja kei Teischä mee lä pfluddärä, sus ischt ä guäti Bänotig im Eimer und ds ganzä Schteiling für d Chatz gsi. Also dass ämal no Haarschprei und ä Föön im Schtall uf dr Ggraunä näbet dr Mälchfettbüggs schtüändend, säb hetti biwarischt niä tenkt. Ä Bürschtä zäm Rimpä hed mi scho komfortabl tunkt. Äs ischt halt nümä wiä früjär. Hofäli ischt ds Chälbli uf dr Wält, chlüüpt mä mä derä gälbä Fäkt in d Oorä, de chunnts in dä Chindrgartä und pfuuset im Iglu, drna äswenn tüäntsch mä zä allm här no d Hoorä vröödä. Das Chuäschteiling hed scho viil früjär aagfangä. I psinnä mi, dass i viil ha müässä in dä Schtall, wenn dr Ätti gmolchä hed. Är heds ggooset, albig widr dr Schwanz var Chuä im Gsicht z ha, wenn sch d Fleugä gwerrt hed. De han i de halt müässä där Schwanz hebä bis d Milch im Chessl gsi ischt. Abr ünschi Chuä Juliä hed diä leschtägä Fleugä uf dr Lattä kha. Und will sch dr Schwanz nümä hed chönä bruuchä het sch äs duä präbiärt mit schperzä, dass dr Mälcheimer villä obänübr ischt. Us luutr Lengwiil han i au ättä diä Schwanzhaar äbiz z rächt gschtrichä und drna ä Zopf drus gflochtä. Gärä het i äs Schpengäli odr ä Maschä z usserscht drii taa, abr i weiss nid, was dr Ätti gseid hetti, wenn imschä Chüä z Mal mit ärä Zopfmaschä im Schwanz uf d Weid weerend. Ja und so tuät schi, wiä mä hüt seid, alls wiitrentwicklä. Äs freegät schi nu uf wädäri Siitä?