Wiä mä köhrt van dä Lüüt gäbis dernäs geischtär Mändli äs söll abär nid grad än Uflad si abär än art än Kobold wa den dä Lüüt scho Angscht bereitä chö. Dr eifachheitshalbär sägi dem Gschpenscht nu noch Kobi, äs si gar übärall, abär rächt gsehn hets äbä no niemät. Wär rächt und anständig dür zLäbä geid, hei dän Kobi au noch nieä ärläbt, abär kört dass dernä Geischt-Kobi gäbi säb händsch schon vor meh äs hundärt Jahr umärgmuchlät. Wenn eini oder einä äs schlächts Gwüssni hei wägä Unerlichkeitä, chön denn där Kobi in dr Nacht denn schon ättä in Ärschiinig trätä und dem beträffänd Angscht machä, abär äbä grifbar si das Mändli nid, au wenn einä dr Muot ufbrechti. Wär äswä amä andärä Mensch an Liib ind Guot schadä tetti, si där Kobi zmal da und chönti denn eim grad rächt Angscht inflössä, dass sogar starchi Männär nur noch bewaffnät im Maiäsäss allein im Schlafgmächli blibä händ törfä. Dobmä uf dr Dili kört mä tütli umärlaufä und wemä guot losät drohi där Kobi mit Sanktionä, wägä derä Unrächt wa vor churzäm hescht beganqä. So gäbis au Jegär wo dem Geischt Kobi schon begägnät siänd und ohni ganz guoti Taschälampä nümmä us äm Bärg abär in dä Wald händ törfä. In dermä Fall si dem Angschthaas vamä Jegär nüd andärscht plibä äs an Ort und Stell zwartä bis tagät und där geischtärhaft Kobi wägäm Sunnäufgang schi äswa värzücht. Au uf dä Alpä söll nid grad albig alläs lieb und ehrli mit Lüt un Tier gsin sin und denn chund denn där Kobi vilicht erscht im Novembär gän das Alppersonal suochä. Wenn denn dNächt lengär chomänd hei där Kobi au meh Ziit zun däm Hirt odär Senn ins Gwüssni zreda damit diä au noch dr nechscht Summä dran deichänd.
Wär das nit glaubt, dem ärzelli schon in 3 wuchä än nüüi Gschicht van dem Geischt Kobi.