Nu zum Sägä, eigäntli hätt i ganz anderscht aafaa wellä mid derä Kolumnä: Mid dm Lippästift und dm Mäcköpp, waa miär Frauä in dä letschtä knapp zwei Jaar gspart heind, dm Chnoblauch, waa bi miär grad chnolläwiisch in dr Choscht glandet ischt, ooni Angscht z ha, dass äs di Gspreechspartneri grad cheert, drfür aber mini Maschgälä de uubarmhärzig gmüffelet hed. Oder vu mirä huusgmachetä purpur Sunnähuet Medizin, wa i literwiisch gmischglet hann und schä hööch und tüür vrchaufä hann wellä. Nu, wiä vrchaufä, we mä nid an d Huustürä chlöpflä sötti?
Asä, all das laan i jetz lä siin und vrsuächä dr Fadä iinzfädlä, will s ja zeerscht mal ischt, dass da in ünscher Ziitig di Prättiger Chreemäri äswas im Diälekt sägä oder äbä schriibä taff.
Diälektbiitreeg heind in derä Ziitig ä lengi Tradizion. Sozsägä vur erschtä Uusgab aan im 1901. Värantwortli drfür ischt duä dr erscht Redakter gsin, dr Georg
Fient. Das ischt där, waa Studäfridli und Gretä ärfundä hed oder ds Buäch «Heimatluft» gschribä hed. Dsäbä ischt no nid bis uulengschtä in fascht jeder Stubä näbet dr Bibli gstandä, Pflichtlektüürä äbä, aber äs bitschi di lüschtiger Uusgab. Viilfach heind schi diä Schriiber hinder Nämä wiä Rütihitsch oder Chasper abm Schnäggäbüöhl vrsteckt. 1955 taucht de ds erscht maal «Aeff» uuf, äs Chürzel für AF oder gnauer Aliesch Fluri. Ma chann s fascht nid glaubä, aber bigoscht, so iss! Under äm Namä Gudlämartisch Happ oder Flügg vam Bärg hed Fluri da hunderti vu Bätrachtigä vrfasst, mid finem Humor und är tuäd s bi Glägäheit albig no, we mä äswas z Sinnd cheem, hed är miär gseid. Frauä sind duä eher dünn gseeti gsin in däm Gäbiet. Di erschtä törftend ds Schuderscher Anneli (Anna Thöny) und d Anna Frick ab Seewis gsi siin. 1975 taucht ds erscht mal d Margrith Ladner-Frei uuf in derä Ziitig und schii ischt albig no drbii. Kein andäri Ziitig hed där Bruuch äso lang gäpflägt, wiä di Prättigeri und tuäd s albig no. Guet, d Chloschterscher Ziitig muess i no in Schutz nää, au diä hed regelmeessig Biitreeg im Diälekt. D Südoschtschwiiz hed s na än paar Jaar und äs paar wenigä Diälekttegscht grad chürzli leider uufgää.
Au wenn i in däm Bezug no än bitz grüen hinder dä Oorä bi, freu i mi uuvrdaalisch, das i in ünscher Ziitig zu däm Bruuch kümpftig au äswas biitragä taff.